Zulum vakıtların zararını düzelderlär

Sovet Kuvedi vakıdında Komunist partiyası tarafından gelän izinä görä binnärlän klisä zorlan kapandı hem yıkıldı, popazlar da Sibirä kaldırıldı. Bununnan insannarı dindän koparmaa savaşardılar, onnarı taa kolay kullanmaa olsun deyni.

Brakmadı o zulum vakıtlar bir tarafa gagauz küülerini hem kasabalarını da. Kongazdan kaarä, hererdä kliselär kapandıydı.

İnsan arasına dinsizlik tohumnarını ekän eriflär kimi kliseleri er üzündän yokettilär: Çadır klisesinin erindä Kultura binası kurdular, Çöşma küüyün klisesinin taşlarından yol yaptılar...

Kimi üüredicilär, ilktän kliseleri kapadıp, sora, islää notalar koymaa deyni, üürencilerä klisenin pençerelerinä zorlan taşçaz attırdardılar. Bu da oldu...

Ama ömür çarkları, amansız döneräk, hepsi işleri erlierinä getirer. Yazık ani kliseleri bozannardan esabı yok kim sorsun. Da genä insannar kendi parasınnan küü kliselerini yaptırêrlar.