Vatan (videoklip)

Ceviz ayın (sentäbri) 15-dä Komrat restorannarın birisindä Moskvada yaşayan Gagauziyanın Tomay küüyündän duumalı Evgeniy KAPSAMUNun rock stilindä yazılı “Vatan” adlı gagauzça türküsünün hem bu türküyä videoklipın prezentaţiyası oldu. Türkü avtorunun Rusiyada büük biznesı var hem o Rusiyanın Dumasının deputatının yardımcısı olarak da işleer.

Prezentaţiyaya teklif edildi hem katıldılar politiklar, muzıka zanaatçıları, yazıcılar hem poetlar, jurnalistlär, kulturamızı sevän insannar.

İki saatlık prezentaţiyada ilktän annadıldı türkü hem türkünün avtoru için, videoklipı hazırlayan insannar için hem o klipın hazırlanması için. Söz gelişi eridir sölemää, ani klipın ideya hem yaratmak anası GRTnın predsedateli Ekaterina JEKOVA. Onun çalışmalarınnan bu klip dünneyi gördü hem klipın prezentaţiyası oldu.

Belliki klip insansız olmêêr. Klipı hazırlayan kollektiv da işin ustasıydı: prodüsor – Boris BEKKET, Moldovanın kıymetli artistı; rejisör – Teodor GUŢU, montaj – Lilian SKUTELNİK. Bundan kaarä klipta pay alan Kazayak “Sevda” ansamblisinin artistleri, gagauz küülerin sıradakı insannarı hem uşakları becerdilär göstermää dünneyä gagauzluumuzu, Vatan sevgimizi, patriotizmamızı.

Evgeniy KAPSAMUNun klipı gagauzça yapılan seftä klip diil. İlk klipı yaptı Gagauziyanın anılmış kultura adamı, kompozitoru hem türkücüsü Vitaliy MANCUL. Ama rock stilindä yapılan “Vatan” türküsünün klipı ilktir.

Bir şüpesiz var nicä demää, ani açan bitki-bitkiyä videoklip gösterildi, salonda bulunannar annadılar, ani türkü halizdän bir patriotik hem duygulu türküdür. Biri-biri ardı söz alan insannar açıklardılar vidiokliplan ilgili candan gelän duyguları. Belliydi, ani hepsicii bir takım düşünerlär: türküdä var patriotizma, var Vatanı hem milleti sevmäk, var ruh.