Onnar hepsi tülüküü insannarmış

Onnar hepsi tülüküü insannarmış

Gagauziya okullarında “Gagauzların istoriya, kultura hem adetleri” urokları veriler. Üüredicilär aalaşêrlar, ani bu konuda aaz mateial varmış. Biz karar aldık, ani, nekadar kuvedimiz var, onnara yardımcı olmaa.

Bakın – istoriya yanımızda. Kaç kişi biler bu anmak taşını? Bekim taa çok Tülü küüyündän hem Çöşmä küüyündän insannar. Bilmeerim. E kalanı? Bilerimbunda kabaatınız yok.

Açan yaklaşêrsın Valkaneş tarafından (diil Çöşmä küüyü tarafından) Tülü küüyünä sol tarafta, küüyä yakın, durêr bu anmak taşı. Neyi o annadêr? Sadä onu, ani I-ci Dünnä cengindä Valkaneş rayonundan insannar mı ceng etti? Osa, ani bölä bir ceng mi olmuş? Yok, sadä bunnarı annatmêêr!

O annadêr onu, ani o cengtä GAGAUZLAR pay almışlar. Bu urêr onnarın zotkalarına, kim yalan yazêr bizim için, ani gagauz halkını askerä almazmışlar. Bu bir.

İkinci da: bu anmak taşı gösterer, ani gagauzları diil salt askerä alarmışlar, ama onuda, ani gagauzlar geroyca ceng edärmişlär. Göster onu da, ani gagauzların arasında ofiţer da varmış! Deyeceniz - şaşılacek bir iş mi? Diil şaşılacek, ama bölä işleri dä bizdän saklardılar. (Osa kendimiz mi bilmää istemäzdik?). Okuyun ne yazêr tabloda: “Bu anmak taşını küülü ofiţer KARANFİL N.N,. koydu”.

Taa bir iş. Bu yazıda laf “küülü” gösterer, ani bu anmak taşında laabları yazılı olan insannar hepsi tülüküülüymüş. Saa olsun ofiţerin oolu KARANFİL A.N., ani eniletmiş bu anmak taşını.

Biz da I-ci Dünnä cengin geroylarının önündä başımızı iilderiz. Topracıklarınız ilin olsun.

Not. Biz danışêrız hepsi okuycularımıza, üürencilerä, üüredicilerä: herliim küüyünüzdä varsaydı bölä meraklı materiallar yazın bizä. Utanmayın. Bölä işleri diil salt siz, diil salt gagauzlar – bütün dünnä bilsin lääzım!