Moldovada presa
Moldovada presa serbestlii yok
Bölä sözlerin altında geçti Kişinövın opera teatrusunun önündä bir miting, ani Hederlez ayın (may) 3-dä presa serbestliin Bütündünnä gününü kutlamsınnan ilgiliydi. Onu Moldova jurnalistlär Birlii (UJM), Baamsız presanın asoţiaţiyası (API), elektronnik presanın asoţiaţiyası (APEL) hem Baamsız jurnalistika merkezi (CIJ) hazırladılar. Burayı toplandı üzdän zeedä vatandaş hem jurnalist.
Moldova jurnalistlär Birlii başkanı Valeriu Saharneanu kendi açılış konuşmasında urguladı, ani mitingın uuru – Moldovada olan presa serbestliinä baskıya erindeki hem halklararası cümnenin bakışını çekmää.“Bu meropriyatiye hazırlandı Çiçek ayın 5-dä olan parlament seçimnerindän sora jurnalistlerä hem basın kuruluşlarınn karşı yapılan korkutma çerçevesindä...
2008-ci yılın Kırım ayın (dekabri) 31-nä kadar yapılan “Freedom House” yıllık dokladı gösterer, ani Moldovada presa serbestlii yok. “Freedom House” yıllık dokladı 2008-ci yılın Kırım ayın (dekabri) 31-ndä yapılı. O üzerä Çiçek ayın 5-dän sora presaya karşı yapılan baskılar hem kısıtlamalar doklada girmedilär” – urguladı Valeriu Saharneanu.
API izmet direktoru Petru Makovey açıkladı, ani beenmeer o jurnalistlerin işini, angıları, kuvettä bulunannarın baskısına verilip, olayları dooru açıklamêêrlar. “Jurnalist läzım olsun demokratiyanın koruycu köpää. Pek önemli, ani jurnalistlär, haliz onnar angıları cümne televideniyasında işleerlär, hakikatlı olsunnar, olayları ölä göstersinnär, nicä o var hem yalandırmasınnar cümneyi. Zerä küülülär, angılarında başka haber kaynarcaları yok, sık dezinformaţiya içindä bulunêrlar” – nasaat etti Petru Makovey.
Mitingta Moldova liberal-demokrat partiyasının liderı Vlad Filat söz alıp, urguladı ani “sadä serbest presanın yaşaması var nicä getirsin demokratiyalı hem evropalı devletin ilerlemesinä”. Vlad Filat hem “Bizim Moldova” alyansından deputat Leonid Bujor mitingta adadılar, ani demokratiyalı kuvedi hem serbest presayı kazanmaa deyni, parlamentı eni seçimnerä getireceklär.
Jurnalistleri yortularınnan kutlamak sözlerinnän mitingta çok yazıcılar hem publiţistlär nasaat ettilär.