Moldova seçimnerin en büük sürprizi

Moldova seçimnerin en büük sürprizi

Baba marta ayın 6-da Moldova Parlamentinä seçimnär oldu. Nicä beklenilärdi seçimneri Moldova komunist partiyası kazandı – 46,1%; ikinci - blok “Moldova Demokratika” – 28,41%; üçüncü - Moldova Hristian-demokratik partiyası (eski halk frontu) – 9,07%.

Başka bir partiya yada blok Parlamenta geçämedi. O üzerä mandatlar bölä pay edildi: 56 – komunistlär, 34 – blok “Moldova Demokratika” hem 11 – hristian demokratlar.

Moldova Parlamentinä seçimnerin en büük sürprizi – Gagauziyada komunist partiyası seçimneri kaybetti. Açıklanan bilgilerä görä Gagauziyada komunist partiyası 30,7% aldı, blok “Patria-Rodina” – 51,5% kazandı. Küü-küü baktıynan komunist partiyası ensedi Avdarma, Rus Köselisi, Çok Meydan, Dizgincä, Feropontyevka, Svetlıy, Kitiet, Kıpçak, Karbalı küülerindä.

Parlament çalışmaa başladıı günü eni spiker seçildi - Andrian LUPU. Sora taa bir sürpriz peydalandı. “Moldova Demokratika” blokundan Demokratik partiyası çıktı (önderci Dmitriy DYAKOV). Bu, allelem, verecek kolayını Vladimir VORONİNı enidän prezident seçsinnär. Kanona görä bu iş için 61 oy lääzım. Komunistlerä 5 oy etişmäzdi. Bizä geler, ani o oylar Demokratik partiyasında bulunaaceklar.

D. DYAKOVun bloktan çıkmasına komentariya yaparkana “Mol-dova Demokratika” blokun öndercisi dedi “taligadan babu indiinän, beygirlerä taa ilin gitmää”.

Prezident seçimneri olsun deyni iki kandidatura çıkarılêr. Onnarı ikisini dä komunist partiyası çıkardı. Moldova kanonuna görä, herliim üç kerä koyulan kandidaturalardan birisi prezident seçilmäzsä Moldovada enidän Parlament seçimneri olsun lääzım. Bu işin olmasını sanmêêrız. Ama genä dä vakıt gösterecek. Beklemää az kaldı – Çiçek ayın 4-dä herşey belli olacek.