Hederlez festivali

Hederlez festivali hoş geldin

İki yılda bir kere Komratta “Hederlez” adına gagauz êstrada türküsü hem oyunnarı yarışmak Festivali olêr. Bu yıl Festivaldä Gagauziyadan hem Ukraynanın Bolgrad rayonundan ansamblilär hem türkücülär pay aldılar. Festival pek meraklı geçti. Katılannarın ustalıı büüktü. Onuştan sık-sık erlär ikiyä payedilärdilär.

Festivalin en Büük ödülünü – Granpri – Çadırdan “Çayır” ansamblisi (önderci – Mihail KULEV) aldı . Kalan erlär bölä payedildi:

Solistlerin arasında ilk eri kongazlı Andrey PALİK hem valkaneşli Dimitri NEDOV payettilär.

İkinci erdä kongazlıyka Mariya İKİZLİ hem Ukraynanın Bolgrad rayonun Bolboka küüyündän Natalya NEÇEVA bulunêrlar.

Üçüncü eri jüri bolbokalıykaya Sofiya BOGDANOVA-ŞONKOVAya hem baurçuluykaya Lüdmila TUKANa verdi.

VİA ansamblilerin arasında birinci eri payettilär Kongazdan “Gül” (önderci – Födor MİNKU) hem Komrattan “Serin Su” (önderci - Födor RADİONOV) ansamblileri.

Kalan erleri Kazayktan “Milenium” hem Ukraynanın Bolgrad rayonun Dimitrovka küüyün “Zümbül” ansamblileri kapladılar.

Oyun ansamblilerin arasında ödülleri Valkaneştän “Gençlik” (önderci – Vera ÇİFLİKLİ) hem Komrattan “Vdohnoveniye” (önderci – Svetlana GAYDARCI) ansamblilerinä verdilär.

En islää kompozitorlar olarak Födor RADİONOV (Komrat) hem Leonid URUM (Çöşmäküüyü) tanındılar.

Verildi ödül peetçilerä dä: Todur MARİNOGLUya, Andrey PALİKä hem Födor KİROVİÇä.

Jurü genç türkücüleri kongazlıykayı Marina NİKOLAEVAyı hem aydarlıyı Georgiy KURDOGLUyu da nışannadı.

“Hederlez” adına gagauz êstrada türküsü hem oyunnarı yarışmak Festivalindä hepsi pay alannara diploma, para ödülleri hem baaşışlar verildi.