Festivale katıldılär hem nicä katıldılar

Kişinevun Ştefan çel Mare parkında Ceviz ayın (sentäbri) 19-da geçti “Çeşitliktän birleşmäk” adlı X-cu Etnofestival. Onu hazırlêêr Moldovanın Etnikaarası ilişkileri bürosu. 6 yıl sıravardı Gagauziya hem Gagauziya başkannarı bu festivalä katıldı. Sora katılmaya sakınmaa başladılar. 2008-ci yılda 8-ci festivalä sade bir ansabli yollamıştılar. 9-cu festivalä sa hiç katılmadılar.

2009-cu yılında Etnofestivalin “Gagauzlar Aulu”, “Gagauzlar evi” eri boş kaldıydı, ama buna bakmadaan gagauz insannarı hep okadar festivalä katıldılar. “Ama onnar bu yortuda üüsüz gibiydilär, çil gibi daalmıştılar. Kimileri “Azerbaycan aulunda” konaktı, kimileri greklärlän “buyurardılar”, kimileri tatarlarlan tatlı laf buşmuştular, kimileri sţenadan gagaz türkülerini çaldılar” (“AS” No.9, 26.09.2009).

Bu yıl X-cu festivalä Gagauziya katıldı. Hem nicä katıldı! Masalar kurulu, filcannar dolu, Gagauziyayı annadan sergilär hem stendlar, tertipli ansamblilär hazırlı. Gagauziya Başkanı kendisi, Başkanın birinci yardımcısı, Gagauziya Upravleniyaların Başların çoyu burada dokuyup-bulunardılar. Paalı musaafirleri (Moldovanın geçici prezidentı, politika partiyaların liderları) tuz ekmeklän karşlardılar. Nedän acaba?

Cuvap belli: yaklaşêr Moldova Parlamentı hem Gagauziya Başkanı seçimneri. Tabannar yanêr. Läzım göstermää, ani Gagauziyanın başkannarı büünkü gündä kuvettä bulunannarı severlär, bakırsın bekim onnardan birileri kendi sepedinä alaceklar.