Falcılık hem farmazonnuk

Taa ilerdän Gagauziya öndercileri bildirdiydilär, ani Rusiyadan bu yıl parasız yardım olarak gelän 5 BİN TON solärka insannara parasız da daadılacek. Ama taa sora, kendi kararlarına görä, açıkladılar, ani solärka parasız verilmeyecek, ama insana paraylan daadılacek hem solärkanın 2 BİN TONU (büünkü paalara görä 2 MİLİON AMERİKAN DOLARINDAN ZEEDÄ) Gagauziya Başkanın rezervasına koyulacek.

Harman ayın (avgust) 19-da GRTda olan cannı yayında, gazetamızın baş redaktoru Todur ZANETin soruşuna: “Neçin insana solärka paraylan daadılacek? Litrası yaklaşık 9 leydän. Hem ne o solärkadan Başkanın fonduna 5% ödenecek?” Gagauziya Başkanın birinci yardımcısı Valeriy YANİOGLU ilktän dedi, ani bölä bişey yok. Ama sora, açan ona argumentlar getirildi, Canabisi açıkladı, ani bölä bir durum var. Solärka geeri dönän yardım gibi veriler. Bu “geeri dönän yardım” ne annamına geler?

Valeriy YANİOGLUnun sölediinä görä solärka insannara parasız veriler, ama bir vakıdadan. Sora onnar o solärkayı geeri çevirsinnär läzım. Herliim solärkayı çevirämärselär, ozaman onnar läzım olacek ödesinnär o paayı, ani şindi koydu İspolkom hem o 5%.

Ne düşer sölemää 2 bin ton Başkan rezervası için, Canabisi ölä da cuvap verämedi neçin bu rezerva yapıldı. Başka kaynaklardan da doorusunu üürenämedik. Onuştan o dooruluu üürenmää deyni bizä kalêr sadä fal atmaa. Neylän falı attık önemli diil: fasülaylan mı, kiyatlarlan mı, taşlan mı! Önemli o, ani fal Gagauziyada olan birkaç pek fasıl iş gösterdi.

İlkin, onu ani Gagauziya öndercileri büük FARMAZONNAR.

İkinci: Gagauziya öndercileri Farmazonnuk (fokuslar) oyunnarınnan PARASIZ solärkayı PARALI yaptılar. Üçüncü: bir imzaylan olmayan erdän, var nicä demää havadan, kendileri için, bankalar gibi, % yarattılar. Dördüncü: solärkanın ACI dadını TATLI yapıp, bir parmak oynamasınnan Gagauziya Başkanının fonduna (acaba fonduna mı?) 2 MİLİON AMERİKAN DOLARI koydular.

Bunnarı fal gösterdi. Fala küsmää diil läzım. O sade gösterer onu neyi gösterer. Bizä sa kalêr sormaa (ama kimä soracez?): SOLÄRKA KİMÄ VERİLDİ, BAŞKANA MI OSA GAGAUZİYEYA MI?

Başkana sa - açıktan sölesinnär. Gagauziyaya sa - ozaman iş başka. Ozaman burada FARMAZONNUK geçmeyecek.