Dünnää gagauzların II-ci kongresi

Vikipediya saydından
Git hem: kullan, ara

Gagauziya hazırlanêr dünnää gagauzların II-ci kongresinä

Gagauziya ispolkomu kendi toplantılarında durmamayca Kongreslan ilgili soruşlar inceleer, meropriyatiyalar plannarı hazırlêêr. Neetä var, dünnä gagauzlarından kaarä, aşırıdan başka paalı musaafirleri da çaarmaa, Gagauziya kurulması istoriyası için 5-6 kiyat çıkarmaa.

Belli ki Kongreslan ilgili harçlar beş-on bin olmayacek, üz-ikiüz bin da olmayacek. Harçlar milion leyi geçäbilir. Şindi smeta yapılêr.Bu para neredän alınacek: bücetniklerin zarplatasından mı, üüredicilik kuruluşlarından mı, soţial sferasından mı? Bekim sadä sponsorların cöbündän? Bunu büün taa birisi bilmeer.

Ama ani bu para neredän sa buralardan çekilecek var nicä annamaa ondan, nelär açıktan söledilär Gagauziya Başkanı Mihail Formuzal hem Gagauziya Başkan yardımcısı Nikolay Stayanov universitettän öncä üüredici kuruluşların direktorlarının önündä.

Hederlez ayın (may) 5-dä direktorlar Komrattakı “G.Gaydarcı” adına rayon teoretik liţeyindä toplandılar. Toplantıda şkolalarlan hem üürediciliklän ilgili soruşlar incelendi.

Soruşlara taa geçmedään söz aldı Gagauziya Başkanı Mihail Formuzal. Nasaatında Canabisi urguladı, ani “finans krizisı gelmedään öncä, Gagauziya İspolkomu üüredicilik uurunda iki yıllık finans borçlarını kapattı. Bakmadaan ona da, ani Moldova büceti I-ci kvartal için 7 milion 541 bin ley Gagauziyaya borçlu kaldı... Çiçek ayından (aprel) beeri Moldova Pravitelstvosu zarplataları genä kaldırdı, ama Gagauziyaya merkez bücettän gelän paralardan 26 milion ley kesti... Bundan kaarä her ay biz läzım ödeyelim 1 milion ley kredit için, ani öbür İspolkom 2006-cı yılda almıştı”.

Gagauziya Başkanı urguladı ki dünneydä hem Moldovada finans krizisı var, ama açıktan söledi, ani “herliim Moldova Pravitelstvosu zarplataların kaldırılması için kararını finans yardımınnan kaavileştirmärsa, ozaman pedagoglar otpusk için hepsi parayı vakıdında kabletmeyeceklär”. Bundan sora o teklif etti, iç rezervalarına analiz yapıp, harçları aazaltmaa hem erinä erleştirmää.

Başkan yardımcısı Nikolay Stoyanov kendi sözündä açıkladı, ani “Gagauziyanın bütün bücetindän, 256 milion leydän, 155 milionu üüredicilik sistemasına deyni ayırılı. O üzerä merkezdän bütün paranın gelmemesi ilkin üüredicilik sferasına urêr”.

Hepsi krizistan baseder. Ama bu arada unutmêêrlar Dünnä gagauzların II-ci Kongresi için da lafetmää. Olêr, ani Kongres bir tarafta, krizis ta öbür tarafta.

Bekim onnarı birleştirelim da, krizis beterinä Dünnä gagauzların II-ci Kongresini ileriyä brakalım, Kongres için hazırlanan hem harcanan paraları üüredicilerä verelim. Zerä üüredicilär daalarsalar olmayacek kimim için hem kimä Kongresi yapmaa.