Bütün Ukraina Gagauzların Birlii

Bütün Ukraina Gagauzların Birlii — Ukrainadaki hepsi gagauzların organizațiyası.

Ukrainadaki hepsi gagauz dernekläri kendi suyu içindä kaynardılar, nesa yapardılar, ama yaptıkları için başka gagauzlar kimär kere hiç işitmärdilär, hem yapılan işlär bir-iki günnük işlärdi. Şindi, artık bu durum diişilecek. Zerä Ukrainanın çoyu bölgelerindä bulunan derneklär birleşmeyä karar verdilär.

2006-cı yıl dekabri ayın 8-dä, Ukrainanın baş kasabasında Kievda eni bir dernek kuruldu – Bütün Ukraina Gagauzların Birlii. Birlin kurulma Kongresindä Ukrainanın ondört bölgesindän delegatlar vardı. Delegatlar oy birliinnän eni kuruluşun Ustavını kablettilär. Nedän sora Birliin başkanını hem reviziya komisiyasını ayırdılar. Bütün Ukrayna Gagauzların Birlii başkanı Vasiliy Kelioglo (gagauzların Kievdakı “Halk Birlii” dernään başkanı) seçildi.

Hep o günü Kievda taa iki büük meropriyatie oldu: etnokultura festivali “Ukraina çiçekleri topluluu” hem “Taras Şevçenko” adına devlet universitetindä “Ukrainada gagauz kulturasının korumasınnan hem ilerlemesinnän ilgili problemalar” simpoziumu.

Simpoziumda üz kişidän zeedä insan pay aldı: departamentlerdän hem bakannıklardan musaafirlär, Bütün Ukraina Gagauzların Birlii kurulma Kongresinin delegatları, studentlar. Vardılar burada Ukrainanın okullarından gagauz dili üüredicileri dä. Söz gelişi Universitettä bu üüredicilärä deyni gagauz dilinnän ilgili iki aftalık kurslar yapıldı. Kursları, nicä da simpoziumu bilim doktoru Tudora Arnaut götürdü.

Etnokultura festivalindä Ukrainanın Kotlovina (Balboka) küüyündä ansambli “Sevda gülü” pay aldı. Bu festivalin çerçevesindä Ukrainanın “Mini Miss” gözellik yarışı oldu. Yarışta Ukraynada yaşayan sayıdan aaz milletlerin (azerbaycan, Krım tatarları, Kazan tatarları, gagauzlar, bulgarlar, nemţelär, poläklar, moldovannar, rumınnar, ruslar) temsilcileri pay aldılar. Gagauzların temsilcisi, altı yaşındakı Karina Kelioglo, yarışın “Miss – siiredicilär simpatiyası” oldu.