Şarap yortusu üçüncülää geldi

KİŞİNÖVA

Yortu cumaertesi, Canavar ayın 9-da, Kişinövun merkez meydanında başladı. Sora yortuya katılan şarapçılar “Mold-Expo”ya yayan yollandılar. Burada “Mold-Expo”da onnarın sergileri hazırdı hem, kurulan plana görä, yortunun hepsi meropriyatiyaları geçecekti.

“Mold-Expo”da, sţenada, onnarı Moldova Prezidenti Vladimir VORONİN, Moldova Parlamentın spikeri Evgeniya OSTAPÇUK, premyer-ministru Vasiliy TARLEV beklärdilär. Yortuya katılannara uzun bir sözlän Moldova Prezidenti Vladimir VORONİN danıştı.

Sora sţena önündän şarapçılar paradı geçti. Nedän sora da Prezident Vladimir VORONİN, spiker Evgeniya OSTAPÇUK, premyer-ministru Vasiliy TARLEV şarapçıların sergilerini gezmää başladılar. Belli ki şarapları hem taa keskin içkileri dadarak. En islää şarap saabilerinä ödül verildi. Onnarın arasında “En islää kırmızı ev şarabı” nominaţiyasında “Altın fıçı” ödülünü valkaneşli İlya HİORA kabletti.

Kişinövda iki gün sürtän şarap Günü yortusunda konţertlär, şaka hem fıkra yarışları, güreş yarışları oldu. El ustaları kendi sergilerini kurdular.

KOMRATA Canavar ayın 10-da Gagauziyanın baş kasabasında da şarap Günü yortusu oldu - “Şarap festivali - 2004”. Yortuda Moldova Prezidenti Vladimir VORONİN, Gagauziya Başkanı Georgiy TABUNŞÇİK, Gagauziya Halk Topluşu Başı Stepan ESİR, GHT deputatları, Gagauziya İspolkomun aza-arı pay aldılar.

“Şarap festivali - 2004” yotusuna katılan şarapçıların arasında SP “Tomay Vineks” hem AO “Vina Komrata” kuruluşlarının şarapları en islää şaraplar olarak tanındı. Bu kuruluşlara diploma verildi.

Bütün gün Komratta türlü yarışlar oldu. İnsannarı şennendirip, kendi ustalıını “Kadınca”, “Serin su”, “Çayır”, “Laalä” ansamblileri, Çadır hem Komrat duhovoy orkestraları gösterdilär. Yortu geç vakıdadan sürttü.

Patrettä: V. VORONİN, E. OSTAPÇUK, V. TARLEV yortunun açılışında.