İlkyaz resim sergisi 2009

İlkyaz resim sergisi 2009

Her yılın Komrat “Atatürk” bibliotekasında “İlkyaz resim sergisi” olêr. Sergi gagauz kultura ömüründä artık yortu gibi bir adet sayılêr.

Bu yıl da Baba Marta (mart) ayın 11-dä Komrat “Atatürk” bibliotekasında açıldı sıradakı sergi, angısını bibliotekanın zaametçileri hem Gagauziyanın resimcilär Birlii azaları barabar hazırladılar.

Serginin açılışında salon insannan doluydu. Çünkü insanar her zaman eni resimnär bekleerlär. Beklemäk ta onnarı aldatmadı – halizdän pek çok gözäl, türlü konularda hem çeşitli tehnikada yapılan eni resimnär sergilendi. Onuştan da bu resimnär gelenneri hiç birini duygusuz brakmadı.

Serginin açılışında vardı may hepsi resimcilär, kimin resimneri burada sergilendi: Mihail Arabacı, Vitaliy Manjul, Dmitri Novak (Ayoglu), Födor Duloglu, Praskovya Bejenar, Grigoriy Deçev, Georgiy Andrieş, Födor Novakov, Nina Peeva, Andrey Kopça, Andrey Yuvarlak.