Çöşmä

Dünneyin istoriyasını annadan çöşmä küüy

Valkaneş dolayının Çöşmä küüyün ortasında bulunêr bu derin hem uzun çukur. İlk bakışta çukur – çukur gibi. Ama bu diil ölä. Gagauziyanın, Moldovanın, kär Dünneyin da istoriyasının annatmasında bu çok önemli bir çukurdur. Bölä açık, er üzünä bölä yakın bulunan erlär dünneydä az var. Bilimcilär için onnar çok önemli, zerä vererlär kolayını ERİN KURULMASINNAN ilgili soruşlara cuvap vermää.

Üzlärlän milion yıl geeri, açan Er üzünü denizlär kaplarmış, açan topraan hamuru karılarmış, büünkü çukur deniz altıynış. Ozamannar, nicä da şindi, toz-toz, trofa-trofa olan kırıntılar, istoriyanın geleciindä iz brakıp, denizin dibinä çökärmişlär. Bu izleri büünkü gündä bilimcilär aaraştırêr.

Sovetlär vakıdında Çöşmä küüyünün çukuruna devlet tarafından korunan pamätnik statusu veril-diydi. Büün o status için hiç birinin aklısına da gelmeer. Ama, genä dä, saa olsunnan çöşmäküülülär, o çukuru koruyêrlar.