Referendum için ilk adımı Kongazçık yaptı

Vikipediya saydından

Açan Moldovada “Gagauziya (Gagauz Yeri) özel hak statusu için” zakonunu diiştirmää deyni Moldova Yustiţiya Ministerliin kanadı atında Moldova pravitelstvosunun çalışmak grupası kuruldu, Gagauziya Halk Topluşu buna karşı kendi tepkilerini aldı.

İlktän konuylan ilgili Hederlez ayın (may) 23-dä 17-dä Gagauziya Halk Topluşun üstolan toplantısı oldu. Orada bir soruş incelener: Moldova Respublikasının öndercilerinin Gagauziya (Gagauz Yeri) avtonomiyasının yok etmesinä denemelerinä bakış. (Söz gelişi o üstolan toplantıda ne Gagauziya başkanı, ne da İspolkom başkanın yardımcıları vardı).

Bu arada, Leonid DOBROV öndercilii altında, kuruldu bir iniţiativa grupası, angısı topladı 6 bin imza “Gagauziyanın Moldova Respublikasından çıkması hem 1990-cı yılın Harman ayın (avgust) 19-da kurulan Gagauz Respublikasına dönmää deyni” Gagauziyada referendum yapmak için.

Sora, Orak ayın (iyül) 17-dä, GHTnın İnsan hakları hem zakonculuk komisiyasının teklifinä görä, Halk Topluşunda açık bir cümne toplantısı oldu. Orada Moldova Respublikasının içindä ya dışında Gagauziyanın gelecää için konuşmalar oldu. Bu proţeslara ön vermää deyni hem onnar zakon çerçevesindä yapılsınnar deyni, Orak ayın 26-da Gagauziya Halk Topluşun Başı Dimitriy KONSTANTİNOV yolladı Gagauziyanın hepsi primarlarına hem sovetniklerinä bir kiyat hem GHTnın İnsan hakları hem zakonculuk komisiyasının Kararını, angılarında teklif ediler herbir küüdä hem kasabada bu konuyu incelesinnär hem 2013-cü yılın Ceviz ayının (sentäbri) 25-dän küü toplanrılarında, sobraniyalarda hem sovetlerin toplantılarında incelemää üç soruş:

- 2015-ci yılın Kırım (dekabri) ayına kadar Gagauziyada Referendum yapmaa “Gagauziyanın Moldova Respublikasından çıkması hem 1990-cı yılın Harman ayın (avgust) 19-da kurulan Gagauz Respublikasına dönmää deyni”; - Gagauziya halkının Evroaziya ekonomika ortaklıın Tamojnä birliinä bakışı; - Gagauziya halkının Evropa integraţiyasına bakışı.

Bu kiyatlan ilgili ilk haber Kongazçıktan geldi. Harman ayın (avgust) 21-dä Kongazçıkta küü Sovetinın toplantısı oldu. Ona katıldılar GHT deputatları Zahar MİTUL hem İvan BURGUCU, GHTnın İnsan hakları hem zakonculuk komisiyanın predsedateli. Toplantıda incelendi soruşlar: Gagauziya seçicilerin Halk Topluşun deputatlarına danışmaları hem konuylan ilgili GHTnın İnsan hakları hem zakonculuk komisiyasının Kararı.

Kongazçık küüyün Soveti aldı karar 2013-cü yılın Harman ayın (avgust) 29-dan sora toplamaa küü Sovetinin maasuz sesiyasını hem küü toplantısını. Burada karar almaa ne türlü uurda kabletmää “Gagauziyanın Moldova Respublikasından çıkması hem 1990-cı yılın Harman ayın (avgust) 19-da kurulan Gagauz Respublikasına dönmää deyni” Referendum için soruşu.