Son günadan raatlıkta bulunsunnar

Vikipediya saydından

Son günadan raatlıkta bulunsunnar

Açılışa Kişinöv kasabasından hem Gagauziyadan musaafirlär geldilär. Onnarın arasında TİKA Kişinêu koordinatoru Nevzat EŞİLER, Türkiye Büükelçisi ataşesi Rıfat YILDIRIM, GHT Başı yadımcısı Olga Petrovna RADOVA, Gagauziya Başkan yardımcısı Vadim BARBANÄGRA, Valkaneştä Gagauziya Başkanın temsilcisi Födor TERZİ, Komrat hem Çadır primarları h.b.

Açılışta Valkaneş kasabasının primarı Konstantin BOZBEY ilkin söz tuttu. O kısadan annattı İhtärlar Evin düzülmesi için. Söledi, ani şindi burada dört yalnız kalan ihtär yaşêêr hem, ani bu evdä var nicä birdän sade sekiz ihtär yaşasın. Konstantin BOZBEY söledi, ani bu ev olmayaceydı, herliim bütün ükü kendi üstünä almaydı TİKA kuruluşu, ani hem para verdi bu iş için, hem da iş başarılınca onu kontrol altında tuttu.

Sora söz verildi TİKA Kişinêu koordinatoruna Nevzat EŞİLERä. Canabisi annattı TİKAnın Gagauziyaya yaptıı yardımnar için: kiyatların basılmasında; gazetalara, radio hem televideniyeya; fıkaaralara hem okullara.

Nevzat EŞİLER bildirdi, ani ertesi gün Çadırda su sistemasının açılışı olacek.

TİKA Kişinêu koordinatoru Nevzat EŞİLER annattı, ani TİKA bütün dünneydä yaşayan türk milletinä yardım eder. Gagauzlar da o büük türk milletinin bir parçasıdır. O üzerä da bu yardımnar hep ilerleyeceklär.

Sora Canabisi dedi: “İhtärlar Evinä” Türkiyedä “Huzur Evi” deerlär. Gagauzçaya çevirdiinän Raatlık Evi olêr. İsteerim, ani burada kalan insannar son günädän raatlıkta bulunsunnar”.

Sora söz alan GHT Başı yadımcısı Olga Petrovna RADOVA, saa ol etti TİKAya yardım için hem hepsi o işlär için, ani onnar yapêrlar gagauzlara deyni. Kutladı hepsini Raatlık Evin açılmasınnan. Hem umut etti, ani TİKA hem Türkiye halkı her zaman gagauzlara yardım edeceklär.

Bundan sora Valkaneş kasabasının primarı Konstantin BOZBEY hem TİKA Kişinêu koordinatoru Nevzat EŞİLER Raatlık Evin kapusunda gerili olan şiridi kestilär. Musaafirlerä da Ev içindä êkskursiya yapıldı.

Büünkü gündä Raatlık Evindä dört insan kalêr: MARİNOVA Anna Dimitrievna – 90 yaşında; TOPAL Mariya Nikolaevna – 70 yaşında; MAMEDOVA Vasilisa Afanasievna – 78 yaşında; ONUFREY Fedora Afanasievna - 80 yaşında.

Söz gelişi MAMEDOVA Vasilisa Afanasievnanın kendi büük evi vardı. Ama Canabisi karar aldı da baaşladı onu altı uşaa saabi olan bir ayleyä, kendisi dä Raatlık Evinä yaşamaa geçti.

Bu insannar haliz raatlıkta yaşasınnar deyni Raatlık Evindä onnar için çalışêrlar: PAVLİOGLU P.M. - Raatlık Evin müdürü, NEKULSÄN V.D. - doktor, YANUL N.G. - medsestra, POPAZOGLU V.D. – medsestra yardımcısı, KİRÇU K.G. – aşçı, MARİNOVA M.G. – aşçı, UZUN V.Y. – sanitarka, BRATAN E.P. – sanitarka, ARNAUTOVA M.P. – zavhoz, SİRKELİ S.G., GERMEK P.B. hem ARNAUT K. – bekçilär.

Not. Raatlık Evin çalışma reglamentına görä burayı yalnız kalmayan ihtärlar da alınır. Ama ozaman onnarın senseleleri Raatlık Evinä para ödesinnär lääzım – ayda 900 ley.

PATRETLERDÄ: MARİNOVA Anna Dmitrievna, TOPAL Mariya Nikolaevna hem MAMEDOVA Vasilisa Afanasievna (oturêrlar, soldan saaya); Konstantin BOZBEY (solda) hem Nevzat EŞİLER şiridi keserlär; Raatlık Evin personalı.