Çalışmak grupada Gagauziya tarafını korkudêrlar

Vikipediya saydından

Baba Marta ayında Moldovada Gagauziyaylan ilgili ortak bir çalışmak grupası (komisiyası) kurulduydu. Çalışmak grupa lääzımdı aaraştırsın nekadar uygun biri-birinä Moldova Konstituţiyanın statyaları hem “Gagauziya (Gagauz Yeri) özel hak statusu için” Zakonu, hem da ne uurda bulunêr merkez hem Gagauziya kuvetlerin arasında ilişkilär. Soruşların arasında vardı Moldova Konstituţiyasını hem başka Moldovanın Zakonnarını “Gagauziya (Gagauz Yeri) özel hak statusu için” Zakona görä doorutmaa hem uygulamaa.

Geçti üç ay da annaşıldı, ani bu komisiyanın çalışması “kör sokaa” dayandı. Ani bu iş olacek belliydi taa baştan. Zerä komisiya taa ilk toplantısından beeri “Komisiyalar zakonuna” (komisiyalar kurulêr sadä işi battırmaa deyni) görä işledi. Bu da heptän belli oldu çalışmak grupasının Gagauziyadan azalarının Orak ayın 16-da Gagauziya Halk Topluşunda pres-konferenţiyasında. Orada pay aldılar GHT deputatları (fotoda soldan) Anatoliy TOPAL, Georgiy LEYÇU, İvan BURGUCU, Sergey ÇİMPOEŞ hem İvan TOPAL. Onnarın açıklamasına görä grupanın önünä koyuldu tekliflär Moldovanın 20 zakonunu diiştirmäk için. Ama, nicä urguladı İvan TOPAL “o tekliflär devlet dilindä yazılıydı, da bu vermedi kolayını onnarı incelemää… Onnar teklif ederlär diiştirmää zakonnarı kultura için, bibliotekalar için, sport için… Bunnar bizim için hiç önemli diil”. Pres-konferenţiyada annaşıldı, ani Moldova tarafından çalışmak grupanın azaları “istämeerlär annaşmaa”, “inadına dialoga açılmêêrlar”. Nicä var bir laf “Ne suvan imişlär, ne suvana kokêrlar”.

Pres-konferenţiyada belli oldu, ani çalışmak grupasında “Gagauziya tarafını korkudêrlar”. Bunu bildirdi deputat İvan BURGUCU. Canabisi söledi, ani “bizä deerlär, ani biz kayıl olmarsak onnarın tekliflerinnän, parlament hiç bişey incelämeyecek. Halizdän bu korkutmak!”

Bakmadaan ona, ani taa baştan bu çalışmak grupası kuruldu Moldova (!!!) Konstituţiyanın statyalarını hem Moldova (!!!) zakonnarını “Gagauziya (Gagauz Yeri) özel hak statusu için” Zakona görä doorutmaa hem uygulamaa deyni, bunu başaşaa devirip, Moldova tarafı “Gagauziya (Gagauz Yeri) özel hak statusu için” Zakonunu diiştirmää kalktı. Bu işi çalışmak grupanın taa ilk buluşmasından sora, Çiçek ayın (aprel) 15-dä, Moldova parlamentın spikerı İgor KORMAN açıkladı: «Члены совместной комиссии парламента страны и Народного собрания Гагаузии обсуждали 15 апреля вопрос приведения закона об особом правовом статусе автономии в соответствии с законодательством Молдовы.» (bak statyayı “Komisiya angı yımırtayı yımırtlayacek: biyazı mı, karayı mı?”, “Ana Sözü”, No. 7-8 (602-603), 30.04.2014).

Şindi da, pres-konferenţiyada bildirildi, ani çalışmak grupanın başı Moldova parlamentın deputatı Dumitru DYAKOV teklif etmiş, ani “Gagauziya (Gagauz Yeri) özel hak statusu için” Zakonda diiştirmeklär yapılsın.

Neyä GHT deputatı İvan BURGUCU cuvap vereräk tekrar urguladı, ani “komisiyanın en büük uuru Moldovanın Zakonnarını hem norma aktlarını “Gagauziya (Gagauz Yeri) özel hak statusu için” Zakona görä doorutmaa hem uygulamaa”.

Canabisi genä dedi, ani “Grupanın faydalı çalışması için 3 iş lääzım yapılsın: 1. Erinderki kuvetlär lääzım kendi norma aktlarını “Gagauziya (Gagauz Yeri) özel hak statusu için” Zakona görä doorutsunnar. 2. “Gagauziya (Gagauz Yeri) özel hak statusu için” Zakona uymayan Moldovanın zakonnarını doorutmaa. 3. “Gagauziya (Gagauz Yeri) özel hak statusu için” Zakonunu Moldova Konstituţiyasının zakonu yapmaa.”

Dimu ERİBAKAN